Chinram laifang ah a ummi [ The Heart of Chinland ] Hakha khualipi nih a tonmi kokek rawhralnak hi Pathian nih tharchuah a timh caah a si timi cu caan nih a fianter chin lengmang tiah ka hmuh. Kan lungput kan thar chuah lai, Kan vawlei kan fing le kan tlang kan tharchuah lai, kan inn le kan lo zong kan thar chuah lai. Kan lo thawh le kan thingpurh zong kan tharchuah lai. Ka nuncan ziaza zong kan thar chuah lai.
Kan lungput hi miphunpi lungput in kan tharchuah la. Chinram a laifang ah a ummi kan si bantuk in nule pa dirhmun in kan dirhmun kan tharchuah lai. Lungput pical ngeih kan zuam lai, peng dang nakin lungsau thinfual kan I zuam lai, dawtnak le zangfahnak thinlung zong a hlei in ngeih kan I zuam lai. Kan miphun cungah zaanghlei cawi lungput ngeih kan zuam lai. Dawtnak, zangfahnak le thlachiat ruahnak lungput in kan tharchuah lai
Kan ram dawtnak thinlung zong kan tharchuah lai, Kan fing le kan tlang ah tingkung, pangpar phuntling cin than kan I zuam lai. Va phuntling, saram phuntling lenak ram ah kan tharchuah lai. Kan fing le kan tlang hna hi dollar phaisa hmuhnak caah kan tharchuah lai. Chokhlei, dingdi, senri, vaurawng le thingkep par hna nih kan tharchuah lai.
Hakha khualipi cu sui khualipi ah kan ser than lai, city planning tein kan tharchuah lai I, Falam lam lei le Thantlang lei lam ah khua thar in kan thar chuah lai. Kokek rawralnak ruangah umnak a ngeih lomi hna caah International standard tluk dawh in inn le lo, lam le sul kan thar chuah lai. Hakha City Hall nganpi zong ngeih kan I zuam lai. Shopping center nganpipi zong ngeih kan I zuam lai. Chin State parliament innpi zong kan ngei cang lai. A rauh hlan ah Hakha collage kan ngei lai I, University sianginn ah kan tharchuah kan I zuam lai. CCC sianginn zong CCU sianghlerun ah kan tharchuah cuahmah lio a si. A rawkmi sianginn, biakinn hna zong a dawh bikmi le a fek bimi inn le lo ah kan tharchuah lai.
Pathian nih kan khua le kan ram tharchuah a duh bantuk in kan lungthin le lungput zong tharchuah a duh. Kan tonmi thil vialte hi hmailei ka kalnak laam thluan caah hmuhsaktu le fimchimtu lawngte an rak si.
By - Salai Lairam Thang