2009 lio ah State dangah Khual kan rak tlawng. Cuticun Khrihfa buu leiin asi caah. Lunglawm tein kan vatlawm mi hna nih an inn tein an rak kan don. Cuticun tlun inn phot cio asi. An umnak Apartment maw an inn ah maw va tlun kan si. Cuticun nihnih nithum hrawng an inn ah an ngeih mi hrawm awk atha mi thil paoh cu kan i hrawm ahau. Tahchunhnak ah tthutdir nak tthutden-Solfa le ekinn te hna rawl einak kheng haileng tibantuk zong. Cun kuttawl nak le etc… Cuhna pawl cu i hrawm ve ahau. 2009 lio khua kan rak tlawn nak ah cun kan hawinu pakhat nih kei cu rawl zong ka ei kho lo. Ti zong ka kholh kho bak lo tiah ka sinah arak chim. Ziah zeiruangah dah rawl cu na ei khawh lo. Akholh zong nai kholh khawh lo tiah ka hal. Aka leh mi cu. Fungte na tlunnak inn le ka tlunnak inn cu zohnak le inn ngeitu hna hmuhnak bantuk asi lo. An inn chung ka luh bak in. An inn chung arim hi a celh bak in ka celh lo ati. Rawl kan tuah cang lai an vun ti lawngah khin an fanu kheng an ttawl ter. Zingka an einak kheng cu zanriah ei lai lawngah an ttawl. An rawl ei zoh tik zongah ka duk atla hrimhrim lo. Kai kholh lai tiah ti kholh nak ah ka kal i an ti kholh nak inn chung cu a buar bak in a buar i arim celh ding asi hui lo. Ka luak tu kai luak ati. Ka zun achuah caah zun inn ah ka kal tthan. Zunzun nak ding hmun cu ka hmuh hui i ka celh lo azual. Achungkhi cu chim lo atlang hrawnghrang hmenh khi ek pel hna i neh sehlaw ka lawh ter cucaah an inn tlun le nan inn tlunnak cu van le vawlei asi ko tiah ka sinah a rak chim. Ani hnihnak ah ka sinah ka tthial ter. Fihhnawmh timi hi kan mah ca lawngah siloin midang ca hrimhrim ah fihnung le teifiak asi. Nai thianhhlimh loah cun fihnung na si ko lai. Innlo hna that ngai i achung vun luh tikah Bahrum le Ngapih rim rumro hna anam cangah cun mileng le khualtlung caah ahar tuk hringhren. An hmai lei khah ding asi lo.
Chinmi cu ai tlawngkai huam mi kan si. Hmailei zongah nan Khrihfa buu ah kadang State in Mino leiin maw Nubuu leiin maw Pastors te zong tiin Khrihfa buu i tlawn kai aum. Hmailei zongah aum peng rih lai. Cucaah kan inn le kan lo cu athian khawh chungin tuah khawh i zuam cio hna usih. Nan inn Carpet aum mi asi ah cun zarhkhat voikhat tel cu a tlawmbik na dawp piak ahau. Zelttuang asi ah cun zarhkhat voi hnih tel na tteih piak aherh. Ek inn-Ingta cu na ttawl zungzal awk asi. Nifa tein na zun na zun nak le na ek na ek nak hmun asi. Nan mileng nan khualtlung nih nan inn chung an rak luh bak in nan inn rim an celh lo ah cun umkhua anuam tilo. Cu i nan coka hrawngah rawlchuannak hnawmhne le a tlawttlau mi a um. Kheng ttawl dinghna i pon tung. Ek inn luh tikah le celh a silo ah cun nan mileng nan khualtlung caah cun ahar hringhren ko. Hihi zapi calawngah asi naisai lo. Acheukhat hruaitu upa le Pastors te inn ko ah hmuh ton asi ttheu. Cucaah kan i thiamhhliamh deuh awk asi. Kanmah kan pum le kan sam kan thuam bantuk tein kan inn le kan lo cu thianhliam deuh ko hna usih. Culawngah na khualtlung mileng caah nan inn cu dotla asi lai. Na khualtlung an i nuam lai, An i lawm kho lai.
Note// Ttial awk hmenh atlak lo. Nain mitam ial inn ah kan ton mi le kan hmuh mi asi caah ttial awk asi ve ko rua tiah ka ruah. Reltu nan cungah ka lawm.
By-fungte