Dallas TX , U.S ah aum mi amin fak Rebecca Bawi Zi Tial dawtnak in Rebecca/ Becca/ Kaka tiah an auh. ATungsan- Hight 5'5ft Arihzan- Weigh 117lbs. Rebecca cu Pyin Oo Lwin (Maymyo) khua ah a chuak. Anu le Apa cu Pi Tha Len Sung le Pu Freddy Lyan hna an si. U.S ah kum hra tluk an um ve cang. Atu hi Lewisville High School - LHS ah taang hleihnih a kai lio asi. Sianginn lei in awards zong tampi ahmu mi asi. Amah hrimhrim nih hin an sianginn kai nak ah Chin Miphun Ni hna zong an tuah i amah nih biatak tein a tawlrel pi hna. Cun an Khrihfa buu ECBC-Dallas TX ah Mino upa kum hnih nak a ttuan lio. Hlasak zong athiam ngaingai te cun cosmetology (ttamh) Volleyball bengh, Tennis tuk le Guitar tibantuk hna hi ahuam mi le athiam mi an si. Naitan Chin Youth Organization -CYO Convention ah Fashion Show zuamnak ah Model lei in a pahnihnak laksawng zong ahmuh ve. Hmailei caah timh tuahnak ka ngeih mi hna cu Socialogy degree lak ii kan Chin Community caah research tuah, Asiloah Bible sianginn kai ii Pathian nih a ka hruai ning lam hoih in a rianthiang ttuan asi lai. Cun Keimah Pasal ca ding ah zei bantuk minung dah ka duh tiah cun, Ahmasa bik ah Pathian aa bochan mi. A chungkhar le ka chungkhar aa dawmi asi lai ii micungah theidannak a ngei lai lo. Midang vialte a upat (respect) kho mi asi lai ii amah hrimhrim zong upat awk tlak, zohchunh awk tlak in a nung mi asi lai. Cun a donghnak bik ah, zumh awk tlak mi pasal tha asi lai. Ramdang pa vat hi ka kham lem lo kei cu. Duhdawtnak cu kan mah nawl in kan thim, kan ham khawh mi thil asi lo caah. Minung pakhat nih ramdang nu/pa a duh hna ruangah mawhchiat thlu ding cu asi lo tiah ka ruah. Nain a duh mi hna cu zohchia in a um mi asi bal te ahcun chim awk a um ko hnga. Kan miphun te asi ko i; zudin hmang, buainak chuah pi, Pathian theih setsai loin a um mi nak in cun ramdang pa; Pathian a thei, a fel/ aa diingmi vat cu ka duh deuh ko hnga. Kan Chin nunphung - Culture le kan Pathian a upat, a cohlang mi asi ah cun, ramdang mi he i tthit um zong ah a poi ah ka chia lemlo.
Atu lio Lai Mino ka hmuh hna ning hi phun hnih in a um. Acheu cu caa zong kan i zuam, Kan miphun le kanram caah tiin zuamnak kan ngei, Pathian kan duh, Pathian rian kan ttuan ii kan fel. Hi bantuk mino hna kan Laimi chung ah an um cu kaa uang tuk hna. Acheu tucu chambau ngai zong in kan um rih. A cunglei kan tlinh hna hmanh ah kan lungthin taktak hi a rak mui tawn. Mihmai kan zoh nak ah attha achia thleidan zong kan hngal tawn lo. Midang nak in sandeuh le tthatdeuh kan i cuh nak ah a biapi tak tak mi thil pawl tu kan philh tawn. Mi nawlcawn kan ruah nak ah kan sining tete kan i philh tawn. Kei karuah ning ahcun zeibantuk thil kan ton paoh ah Pathian hmai zoh le toidor buin kan um, kan ttuan ah cun miphun vialte ca zong ah zohchunh awk tlak Lai Mino kan si kho ko lai.
Chin mi nih social media kan hman ninghi a tamdeuh kap lei in cun a ttha ngai ko tiah ka ruah. Ramdang kan chungkhar he i chawnh/biak nak caah kan hman mi hi a sunglawi tuk. Thawngttha le thawngpang i hrawmnak ca zong ah kan hman mi hi thil ttha tuk asi tiah ka hmuh.
Hruaitu lei ah cun Mino hruaitu hna hi an rian ttuan ning a ttha tuk tiah ka ruah. U.S chungum hruaitu hna zong nih mino hna kan i funtom/hawikomh khawh nak hnga caah conference te hna, convention le meeting te hna a phunphun an tuah tawn mi cungah hin ka lungtling ngai. A kan hruaitu hna zong zohchunh awk tlak ngaingai an si, Ka Upat hna. Pakhat te tu cu amin ruang lawngah a ttuan duh mi kan um ttheu tawn. Cun hruaitu dirhmun a phan cang mi zong nih, mi cungah thleidan nak le midang nak in "ka ttha deuh" timi lungput a ngei mi zong kan um ve hoi. Cucaah hruaitu nih hruaitu ka si ti theih i hruaimi zongnih hruaimi lawng ka si ti siloin nikhatkhat ah hruaitu ka si vete lai timi zong kan ruah ah ahau.
Lai tlangval nih phone in siloah Facebook in an ka chawnh tik ah an chim deuh awk asi tiah ka ruah mi cu an mah le an mah i theih ter nak. Aa thei bal lo mi hrimhrim kan si ah cun bantuk i theih ter nak (introduce) i tuah hmasa khi a ttha bik. Culocun leh awk zong khi a ttha tuk tawn lo, a herh mi dah asi ti lo ah cun. Cucaah ai thei bel lo ai hngal bel lo cu kan i chanwh ka le kan i hmuh ka ah cun i theihter nak i tuah hmasa ah atha bik.